17-июнга караган түнү болгон Орусиянын ракеталык соккусунан Киевде каза тапкандар саны 23кө жетти. Бул тууралуу өлкөнүн Өзгөчө кырдаалдар боюнча мамлекеттик кызматы 18-июнда кабарлады.
Киевдин Соломенка районундагы көп кабаттуу үйдүн урандыларынын арасынан куткаруучулар дагы жети адамдын сөөгүн алып чыгышты. Бул маалымат жарыялангандан кийин дагы эки адамдын сөөгү табылганы белгилүү болду.
Чабуулдан жараат алгандар 134 адам.
Өзгөчө кырдаалдар боюнча мамлекеттик кызмат тараткан маалыматта дайынсыздарды издөө уланып жатканын айтылат:
"Бизде каза тапкандар боюнча так сан жок. Шаар бийлиги айрым адамдар байланышка чыкпай жатканын маалымдаган. Бизге белгилүү болгону 35 батир толугу менен талкаланды. Издөө жана тазалоо иштери уланууда".
18-июнь Украинанын борбору Киев шаарында Аза күтүү күнү деп жарыяланган.
17-июнга караган түнү украин баш калаасы Орусиянын жапырт аткылоосуна кабылган. Киевде чабуулга турак үй туш болуп, анын бир бөлүгү толук урап түштү. Украинанын президенти Владимир Зеленский бул чабуулду "Киевге жасалган эң катуу соккулардын бири" деп атады.
Анын айтымында, баш калаанын бир нече районуна 27 жерден сокку урулган.
Украина Куралдуу күчтөрүнүн маалыматына ылайык, Орусия 18-июнга караган түнү өлкө аймагына 58 дрон менен чабуул койду.
Аскердик командачылык алардын ичинен 30 дрон атып түшүрүлгөнүн же өз алдынча кулаганын билдирди.
Москва далилдерге карабастан Украинанын шаарлары менен айылдарынын жарандык инфраструктурасына чабуул жасап, социалдык объектилерин талкалап жатканын четке кагып келет.
Украин бийлиги жана эл аралык уюмдар бул соккуларды Орусиянын "аскердик кылмышы" катары санайт.
“Свобода” радиосунун украин кызматы билдиргендей, Киевге урулган дрон соккусунан кеминде 16 киши каза болду. Калаа мэри Виталий Кличко набыт болгондордун бири АКШ жараны экенин, 55 киши жараат алганын билдирди.
Украинанын Ички иштер министрлиги кабарлагандай, дрон чабуулдары кеминде Киевдин ар кайсы районундагы 27 жерге урулуп, турак үйлөр, билим берүү мекемелери жана башка имараттар зыян тарткан.
Одессада Орусиянын дрон чабуулунан ондон ашык киши жараат алды. Украинанын Өзгөчө кырдаалдар боюнча мамлекеттик кызматы бул соккулардан “олуттуу зыян” болгонун билдирди.
16-июнда Орусия Украинага 1245 украин аскеринин сөөгүн өткөрүп берди. Бул тууралуу Украинанын аскер туткундары боюнча Координациялык штабы билдирди.
"Жалпысынан Украина Стамбулдагы макулдашылган келишимдин алкагында 6057 сөөктү кайтарып алды", – деп айтылат штабдын маалыматында.
Украинанын Ички иштер министрлигинин тергөөчүлөрү жана эксперттери ар бир сөөктү идентификация кылып чыгары маалымдалды.
Орусиянын Тышкы иштер министрлиги Москвага 78 аскер кызматкеринин сөөгү кайтарылганын билдирди.
Москванын билдирүүсүнө ылайык, туткундарды алмашуу процесси жана оор жаракат алгандарды өткөрүп берүү иши уланууда.
Сөөктөрдү өткөрүп берүү келишими 2-июнда Стамбулда жетишилген. Орусия тарап Украинага 6 миң аскердин сөөгү берилерин билдирген.
Стамбул сүйлөшүүсүндө жетишилген келишимге ылайык, Орусия менен Украина 10-июндан бери туткун айырбаштоо жараянын жүргүзүүдө. Алмашуулар 1:1 тартибинде жүрүүдө, бирок азырынча канча туткун айырбашталганы так айтылган жок.
Украин президенти Владимир Зеленский туткундарды айырбаштоо жараяны болжол менен 20-21-июнда аягына чыгарын айткан.
Киевге орусиялык дрондор менен урулган соккудан кеминде бир адам жараат алды. Бул тууралуу Киевдин шаардык аскердик администрациясынын башчысы Тимур Ткаченко билдиргендей, жараат алган 21 жаштагы жаран ооруканага оор абалда жаткырылды.
Ткаченконун маалыматына ылайык, Киевдин Днепров районунда дрон жеке турак жай секторуна кулаган, ал эми Дарница районунда дүкөндөр жабыркаган.
Украинанын Аба күчтөрү командачылыгы 16-июнга караган түнү Орусия украин аймагына ар кандай түрдөгү 138 дрон учурганын билдирди. Алардын 125и атып түшүрүлгөн, бирок он дрон бутага алынган жерге түшкөнү кабарланды.
Запорожьеде дрон кулаган өнөр жай ишканасында өрт чыккан. Ал эми Запорожье облусунун Магдалиновка айылында дрон соккусунан жергиликтүү тургун жараат алган.
Черкасс шаарынын чет жакасында дрон чабуулунун айынан электр энергиясы өчүрүлдү, кыйроолор бар, бирок жараат алгандар жок.