Америкалык демократ сенаторлордун тобу президент Дональд Трамп "АКШнын Ирандагы согушка катышуусун кеңейтүү ыктымалдыгын" караштырып жатса Конгресс менен кеңешип, уруксат алууга тийиш деп билдиришти. Мыйзам чыгаруучулар ошондой эле Тегеран жооп иретинде америкалык базаларга сокку урарын эскерткенин белгилешти.
The Wall Street Journal гезити жазгандай, Трамп Иранга коюла турган чабуулдардын планын бекитти, бирок аны ишке ашыруу буйругун бере элек. Басылманын булактары АКШнын бутасы Фордодогу уран байытуучу завод болушу мүмкүн деп айтып жатышат.
Вашингтон Иранга жакынкы арада сокку урууну даярдап жатканын өз булактарына таянып Bloomberg агенттиги да кабарлады.
АКШнын президенти өзү да Израил-Иран жаңжалына кийлигишүү ыктымалдыгын жокко чыгарбайт.
“Менин согушуу ниетим жок. Бирок согуш менен өзөктүк куралдын ортосундагы тандоо турса, анда зарыл нерсени кылыш керек", - деген Трамп 18-июнда журналисттерге.
Трамп Ислам жумурияты ядролук курал жасоого жакындады деп билдирген.
Ошол эле маалда америкалык Улуттук чалгын кызматында Иран атомдук куралдын үстүнөн иштеп жатат деген далилдер жок экенин 18-июнда MSNBC телеканалынын эфиринде Сенаттын чалгын комитетинин төрага орун басары Марк Уорнер билдирди. Демократиялык партиянын өкүлү Улуттук чалгын кызматы бул тууралуу 16-июнда сенаторлорду кабардар кылганын айтты.
Сенатор кызматтын директору Тулси Габбард 25-мартта "Иран бомба жасоо багытында аракет көрбөгөнүн" айтканын эске салды. Уорнер Трамп "чалгынчылардын маалыматтарына көңүл кош мамиле кылганын" белгиледи.
Израил 13-июнда Ислам жумуриятына сокку урганда Тегерандын өзөктүк жайларын бутага алганын билдирген. Ислам жумурияты ага жооп кайтарып, Израил тарапка ракеталарын ата баштаган.
Тегеран буга чейин өзөктүк курал жасоо аракетинен баш тарта турганын, бирок тынч максатты көздөгөн өзөктүк программасын улантууга укуктуу экенин билдирген. Израил жана Батыш, анын ичинде АКШ Ирандын бийлиги атомдук программага жамынып кооптуу куралдын үстүнөн иштеп жатат деп шек санашат.
Шерине