17-июнь күнү кечинде Армениянын коопсуздук күчтөрү Еревандагы белгилүү миллиардер, орус-армян ишкери Самвел Карапетяндын үйүндө тинтүү жүргүздү. Андан кийин аны күч органдары алып кетти.
Бул тууралуу "Азаттыктын" армян кызматы ("Азатутюн") билдирди.
18-июнда Армениянын Улуттук коопсуздук кызматы Карапетянга “бийликти күч менен басып алууга чакырык жасаган” деген расмий айып коюлганын кабарлады. Бул тууралуу “РИА Новости” басылмасы ишкердин жактоочусуна шилтеме берип жазды.
Маалыматка караганда атайын кызматтын операциясыында 20га жакын адам кармалган. Бирок алардын арасында Карапетян бар-жогу ачык айтылган жок.
Орусиянын Тышкы иштер министрлигинин өкүлү Мария Захарова Москва Самвел Карапетянга байланыштуу кырдаалды дыкат көзөмөлдөп жатканын билдирди.
"Москва Ереванда орус жараны Карапетянга түшүнүксүз жүйөлөр менен камакка алуу коркунучу жаралып жатканы боюнча кырдаалды тыкыр көзөмөлдөп жатат", – деди Захарова. Анын айтымында, Орусия тарап Карапетяндын бардык укуктары сакталышы үчүн зарыл колдоону көрсөтөт.
Ишкерге козголгон кылмыш ишинен кийин Армениянын премьер-министри Никол Пашинян Самвел Карапетянга таандык “Армениянын электр тармактары” компаниясын улутташтыруу ниетин билдирди.
“Менин оюмча, бул компанияны улутташтырууга убакыт келди. Бул тез ишке аша турган процесс жана менин милдетим кызматкерлер өз ишин так аткарышын камсыз кылуу”, — деп жазды Пашинян Telegram-каналдагы баракчасына.
Шаршембиде өкмөт башчы Улуттук коопсуздук кызматынын директору Армен Абазянды кызматтан кетирди. Бирок ал бул чечимдин Карапетяндын кармалышына байланышы барбы же жокпу деген суроого жооп берген жок.
Самвел Карапетян Forbes журналынын маалыматында, Орусиядагы эң бай адамдардын катарында, 3,2 миллиард долларлык байлыктын ээси. (AiA)
Шерине